BULACAN, Philippines – Kalunus-lunos na kamatayan ang sinapit ng mestisahing babae matapos itong sunugin ay sinimento pa at inilagay sa drum saka inabandona sa gitna ng palayan sa Barangay Parada, bayan ng Sta. Maria, Bulacan kamakalawa ng gabi.
Kasalukuyang bineberipika ang pagkakakilanlan sa biktima may tattong “GL” ang kaliwang kamay na halos naagnas nang matagpuan bandang alas-6 ng gabi.
Base sa ulat ni PO2 Jonathan Mañacap, nadiskubre ang insidente habang naglalaro ang ilang kabataan sa gitna ng palayan sa Malabon Street sa Sitio Ibayong Tabon.
Lumilitaw na napansin ng ilang kabataan ang isang drum na may takip na sako at pinagkukumpulan ng langaw.
Inusisa ng mga kabataan ang nilalaman ng drum kung saan bumulaga ang naagnas na katawan ng babaeng nakasimento.
Mabilis naman ipinagbigay-alam ng mga kabataan sa ilang opisyal ng barangay ang nadiskubre kung saan rumesponde naman ang pulisya.
Pinaniniwalaan namang pinatay ang biktima sa ibang lugar saka inabandona sa nasabing barangay upang ilihis ang imbestigasyon ng mga awtoridad.