NORTH COTABATO, Philippines – Umaabot sa anim na libung mag-aaral mula sa13 paaralan sa bayan ng Mamasapano, Maguindanao ang pansamantalang hindi muna pinapasok ng kani-kanilang mga magulang dahil sa takot na maapektuhan kaugnay sa pagmasaker ng mga rebeldeng Moro Islamic Liberation Front (MILF) sa 44 miyembro ng PNP-Special Action Force noong Enero 25, 2015.
Ito ang kinumpirma ni Autonomous Region in Muslim Mindanao regional executive secretary Atty. Laisa Alamia, batay sa datos ng ARMM HEART mula sa Department of Education-ARMM kung saan pinangangambahan ang pagresbak ng mga bandidong Bangsamoro Islamic Freedom Fighters (BIFF) laban sa tropa ng pamahalaan.
Umapela naman si Atty. Kirby Abdullah, assistant regional secretary sa probinsya ng Maguindanao sa publiko na tigilan na ang pagkakalat ng mga maling impormasyon o spekulasyon kaugnay sa nasabing insidente.
Pangunahing concern ngayon ng regional government at office of the Maguindanao Governor na maibalik na sa normal ang kabuhayan sa bayan ng Mamasapano at mapadali ang pagbabalik ng mga residente sa kanilang bahay at muling makapag-aral ang mga kabataan.