MANILA, Philippines – Nagbuwis ng buhay ang bagitong pulis matapos itong pagbabarilin ng lalaking nang-agaw ng baril ng security guard sa isang kilalang mall sa Sta. Rosa City, Laguna noong Martes ng hapon.
Kinilala ang napatay na si PO1 Ariel Abordo, dead-on the-spot sa insidente matapos mapuruhan ng tama ng bala sa katawan. Sa ulat ni P/Supt. Pergentino Malabed, hepe ng Sta. Rosa City PNP, napatay din ang gunman na kasalukuyan pang inaalam ang pagkakakilanlan. Sa imbestigasyon, naganap ang insidente sa kilalang mall sa Barangay Tagapo kung saan biglang inagaw ng di-kilalang lalaki ang baril sa guwardiya ng mall na tinukoy lamang sa apelyidong Ibasco.
Pinaniniwalaang may diprensya sa pag-iisip ang nasabing lalaki.
Nang makita ni PO1Abordo ang komosyon ay mabilis itong napatakbo upang saklolohan ang guwardiya pero bago pa makalapit ay pinagbabaril na ito ng gunman.
Napilitan naman barilin at mapatay ni PO3 Reynante Ingresol ang bumaril sa kanyang kasamahang si PO1 Abordo.