QUEZON, Philippines - Patay agad ang 60-anyos na lalaki matapos pagbabarilin ng dalawang hindi kilalang lalaki na hinihinalang mga miyembro ng Akyat-Bahay Gang sa Sitio Centro, Barangay Paiisa sa bayan ng Tiaong, Quezon kamakalawa ng gabi. Nagtamo ng mga tama ng bala ng cal.9mm pistol sa ulo, dibdib at tiyan ang biktimang si Rodrigo Arias ng nabanggit na barangay. Sa ulat ng pulisya, abalang nag-aayos ng paninda sina John Marquez at Jaime de Ocampo sa gilid ng kalsada nang dumating ang dalawang hindi kilalang lalaki na nakasuot ng pinaghalong camouflage. Tinutukan umano ng baril ang dalawa saka pinadapa at dahil sa ingay sa labas ng bahay ay sumungaw sa terrace ang biktima subalit sinalubong siya ng putok. Matapos isagawa ang krimen ay palakad na tumakas ang gunmen tangay ang mga personal kagamitan na kinulimbat sa bahay ng biktima.