BULACAN, Philippines – Pinaniniwalaang nagkapikunan sa inuman kaya pinugutan ang isang tindero ng kanyang kabarong tindero sa Barangay Sibul, bayan ng San Miguel, Bulacan kamakalawa ng gabi. Halos humiwalay ang ulo sa katawan ng biktimang si Mariano Delos Santos ng Barangay Kalawakan sa bayan ng Doña Remedios Trinidad, Bulacan. Pinaghahanap naman ng pulisya ang suspek na si Joel Pablo, 39, ng Barangay Sibul sa nasabing bayan. Ayon kay PO2 Merwin Mendez, nakikipag-inuman ang biktima at dalawa nitong kaibigang sina Jerry Bermudez at Joseph Pangilinan sa bahay ng biktima nang makisalo sa inuman ang suspek. Nang malango sina Bermudez at Pangilinan ay nagpaalam na ito kung saan naiwang nag-iinuman ang biktima at suspek. Sinasabing nagkapikunan ang dalawa kaya pinugutan ng suspek ang biktimang lango na rin sa alak.