QUEZON, Philippines – Nagmistulang karne ng hayop ang katawan ng mag-asawang magsasaka makaraang pagtatagain ng di-kilalang lalaki na sinasabing nakaaway ng kanilang anak kamakalawa ng gabi sa Barangay Peñafrancia, bayan ng Lopez, Quezon.
Kinilala ng pulisya ang mag-asawa na sina Sofio Santiago Sr., 69; at Salvacion Santiago, 71, habang pinaghahanap ng pulisya ang suspek na pansamantalang hindi muna isiniwalat ang pagkakakilanlan.
Sa ulat ng Lopez PNP, naganap ang pamamaslang dakong alas-7 ng gabi habang ang mag-asawa ay naghahanda ng hapunan.
Napag-alamang dumating sa bahay ng mag-asawa ang isang lalaki kung saan hinahanap ang kanilang anak na si Andy na pinaniniwalaang may atraso.
Nang hindi makita ang pakay ay pinagdiskitahang pagtatagain ng suspek ang mag-asawa sa pamamagitan ng gulok na nakasabit sa dingding ng bahay.
Pinaniniwalaang pinatay ng suspek ang mag-asawa para makaganti sa kanilang anak.