BATAAN, Philippines – Nawala ang mga pangarap na makapagtapos sa high school ng 14-anyos na dalagita matapos itong dukutin ay pinatay saka sinunog pa ng mga di-kilalang kalalakihan noong Martes ng umaga sa Barangay Poblacion, bayan ng Mariveles, Bataan.
Kinilala ng pulisya ang biktima na si Denielle Ferreria y Evangelista, Grade 9 (High School student) sa Llamas Memorial High School sa Barangay Poblacion.
Sa naantalang ulat na isinumite kay Bataan PNP director P/Senior Supt. Raynold Rosero, huling namataang buhay ang biktima na nagpaalam sa mga magulang para pumasok sa nasabing school noong Martes (Nov. 18).
Subali’t hindi na ito nakauwi kung saan bandang alas-5:49 ng hapon ay nakatanggap ng text message ang ina mula sa mga kidnaper na nanghihingi ng P.5 milyong ransom para sa kalayaan ng dalagita.
Napag-alamang OFW ang ama ng biktima kaya inakala ng mga kidnaper na may malaking halagang maibibigay ang pamilya.
Sa follow-up operation ng pinagsanib na pwersa ng Anti-kinapping Task Force mula sa Camp Crame at lokal na pulisya natagpuan ang bangkay ng sunog na katawan ng biktima na nakasako sa gilid ng highway sa Sitio Milagros, Barangay Balon Anito sa bayan ng Mariveles, Bataan.