MANILA, Philippines - Dinukot ng armadong kalalakihan na nagpakilalang mga rebeldeng New People’s Army (NPA) ang bagitong pulis matapos itong harangin sa checkpoint ng komunistang grupo sa kahabaan ng highway sa bayan ng Malimono, Surigao del Norte kamakalawa ng umaga.
Kinilala ni P/Supt. Romaldo Bayting, spokesman ng Caraga PNP ang kinidnap na si PO1 Jonry Amper, miyembro ng intelligence operative unit ng Malimono PNP. Nabatid na nagmomotorsiklo ang biktima mula sa himpilan ng pulisya nang harangin ng mga rebelde sa kahabaan ng highway sa Barangay Bunyasan. Nabatid na nagsasagawa ng surveillance operation si Amper matapos na makatanggap ng impormasyon hinggil sa presensya ng mga armadong kalalakihan sa lugar. Kaugnay nito, bumuo na ng Crisis Management Committee (CMC) upang iligtas ang buhay ng nasabing pulis.