MANILA, Philippines - Napaslang ang mag-asawang Tsinoy habang nasa malubhang kalagayan ang dalawang anak matapos na pagbabarilin ng mga hindi kilalang kalalakihan sa kahabaan ng Don Mariano Ext. Road sa bayan ng Rodriguez Rizal, kahapon ng madaling araw.
Kinilala ni P/Supt. Robert Baesa, hepe ng Rodriguez PNP ang mag-asawang napatay na sina Nelson Go, 56; at Ruby Go, 52, habang kritikal na naisugod sa Marikina Valley Hospital ang dalawang anak na sina Stephen Go, 13; at Robin Go, 21, pawang nakatira sa Metro Hills Subdivision sa nasabing bayan.
Sa ulat ni SPO1 Jerry Cordero, pauwi na ang pamiya Go lulan ng Tamaraw FX (NFN-248) mula sa Maynila nang harangin ng mga armadong kalalakihan pagsapit sa kurbadang Don Mariano Extension Road.
Huminto naman ang mga biktima sa pag-aakalang walang magaganap na masama subalit sunud-sunod na umalingawngaw ang putok ng baril kung saan duguang bumulagta ang pamilya Go.
Narekober sa crime scene ang iba’t-ibang uri ng basyo ng bala ng baril habang patuloy ang imbestigasyon ng pulisya.