NORTH COTABATO, Philippines – Pinaniniwalaang natakot maaresto ang isang pugante kaya nagpasalubong na lamang kay kamatayan matapos itong tumalon sa may 20 talampakang lalim na bangin sa likuran ng kanyang bahay sa Sitio Kipulot, Barangay Palakapao sa hangganan ng bayan ng Alamada sa North Cotabato at Bukidnon kahapon.
Kinilala ni P/Chief Insp. Joefry Todenyo, hepe ng Alamada PNP ang pugante na si Chrisler Hernandez na may anim na buwan nang nakatakas mula sa Amas Provincial Jail.
Lumitaw na sinalakay ng mga operatiba ng pulisya ang bahay ng nasabing pugante para arestuhin subalit kaagad itong tumakbo at tumalon sa likuran ng kanilang bahay na may malalim na bangin.
Naisugod pa sa Cotabato Provincial Hospital ang pugante subalit namatay din ito.
Sa tala ng pulisya, si Hernandez na pumuga noong Abril 2014 ay may kasong murder, carnapping, robbery with homicide, at double frustrated homicide sa bayan ng Alamada at qualified theft naman sa bayan ng Pigcawayan, North Cotabato.