MANILA, Philippines – Brutal na kamatayan ang sinapit ng isang turistang Swiso makaraang pagtulungang saksakin ng mga di-kilalang lalaki saka itinapon sa palayan sa Purok 4, Barangay Togbongon, Surigao City, Surigao del Norte, ayon sa ulat kahapon.
Kinilala ni P/Supt. Romaldo Bayting, Caraga PNP spokesman ang biktima na si Florian Mayer, tubong Geneva, Switzerland.
Bandang alas-9:45 ng umaga nang matagpuan ng isang residente ang bangkay ni Mayer na duguang nakadapa, naka-itim na sando, maong na short at itim na sapatos.
Sa pagsusuri ng mga tauhan ng Scene of the Crime Operatives (SOCO), nadiskubreng tadtad ng mga saksak sa iba’t-ibang bahagi ng katawan ng biktima partikular na sa dibdib, leeg, ulo at nagtamo rin ito ng mga galos sa likuran.
Narekober ang pitaka ng biktima na barya lamang ang laman, driver’s license, credit card, IPhone, gintong kuwintas, silver na pulseras, kaha ng sigarilyo at iba pa.
Ayon sa mga imbestigador, posibleng pinatay ang biktima sa ibang lugar at itinapon lamang sa nabanggit na barangay upang ilihis ang imbestigasyon dahil may mga bakas ng gulong ng sasakyan na nadiskubre.
Pinaniniwalaang dalawa hanggang tatlo-katao ang nasa likod ng krimen base sa magkakaibang bakas ng paa ang nakita.