BULACAN --- Bumanat muli ang isang grupo ng hinihinalang notoryus na mga holdaper matapos na holdapin ang isang sekretarya sa naganap na P.5 M payroll robbery sa Brgy. Sta Rosa II, Marilao, Bulacan kahapon ng umaga.
Dumulog sa pulisya ang biktimang si Marita Jacinto, 42, sekretarya at driver nitong si Reynaldo Martinez, 39 ng Brgy. Sta. Rosa 1 pawang sa bayang ito at kapwa empleyado ng Silver Bridge Metal Mfg. Corp na pag-aari ni ShunYuan Pan na nasa Brgy. Sta. Rosa II sa naturang lugar.
Base sa imbestigasyon ni PO3 Rodel Alcantara dakong alas-11 ng umaga ay kasalukuyang tinatahak ng mga biktima ang kahabaan ng Brgy. Sta. Rosa II lulan ng isang Toyota Fortuner ( EBW-543 ) galing sa mga sangay ng Metro Bank at Banco De Oro upang mag-withdraw ng halagang P549,100 piso na gagamitin bilang payroll money sa obrero ng naturang kumpanya.
Pagsapit sa isang lugar sa INC St., Brgy. Sta Rosa II ay biglang sumulpot ang walong armadong kalalakihan na puwersahang tinangay ang nasabing pampasuweldo saka mabilis na tumakas sakay ng tatlong motorsiklong walang plaka patungo sa direksyon ng San Jose Del Monte City.