NORTH COTABATO, Philippines - Tinatayang aabot sa P3.6 milyong halaga ng mga heavy equipment ang sinunog ng mga armadong grupo matapos salakayin ang compound ng construction company sa Purok Ramos, Barangay Upper Katungal, Tacurong City, Sultan Kudarat kamakalawa ng gabi. Sa police report na nakarating kay P/Supt. Junie Buenacosa, hepe ng Tacurong City PNP, nakasakay ng tatlong motorsiklo ang mga suspek na responsable sa pagsunog ng mga heavy equipment kabilang na ang dumptruck at backhoe na pagmamay-ari ng JY Construction. Naniniwala naman si Buenacosa na posibleng may kaugnayan sa extortion ang isa sa motibo ng mga suspek sa ginawang panununog ng mga ari-arian. Kasalukuyang inaalam pa ng pulisya kung nakatanggap ng extortion letter ang may-ari ng nasabing construction company.