MANILA, Philippines – Umakyat na ngayong Miyerkules sa 13 katao ang nasawi sa aksidente sa lalawigan ng Benguet matapos mahulog ang isang sasakyan sa bangin.
Ayon sa isang ulat sa radyo, isa sa apat na sugatang pasahero ang binawian ng buhay sa ospital.
Walong katao ang agad nasawi sa insidente, habang apat ang namatay habang isinusugod sa ospital.
Karamihan sa mga biktima ay mga estudyante ng Poblacion National Highschool na sakay ng Ford Fiera.
Base sa pangunang imbestigasyon, paahon ang sasakyan sa bahagi ng Bangbangayen, Buguias, Benguet bandang 4:30 ng hapon nang patigilin ng tatlong estudyante ang sasakyan.
Dahil nakabitin sa paahong bahagi ng kalsada ay namatay ang makina ng sasakyan bago nawalan ng kontrol ang driver.
Bumulusok paatras ang sasakyan saka tumilapon sa 100-metrong bangin.
Patuloy pa rin ang imbestigasyon ng mga awtoridad sa insidente.