CAVITE, Philippines – Dalawang pangunahing suspek sa pagpatay sa dalawang tinedyer sa bayan ng Noveleta, Cavite ang sumuko sa mga awrtoridad kamakalawa.
Kinilala ni P/Senior Supt. Joselito Esquivel Jr., ang mga suspek na sina Augusto Lising Sr. at ang 13-anyos na dalagita na kapwa itinangging sangkot sila sa pagpaslang sa mga biktimang sina Karren Aguirre, 16; at Renald Dela Cruz, 14, mga nakatira sa Barangay Salcedo II na natagpaung patay noong Agosto 24 matapos mawala noong Agosto 14.
Bukod sa dalawang suspek ay kinilala rin ang iba pang suspek na sina Lino Bartolo, alyas Julius, Joe Vargas, Bernie Abales at si Leydel Lising.
Pinaniniwalaang paghihiganti ang isa sa motibo kaya pinatay ang dalawang biktima dahil ang dalawa umano ang sinasabing nagbigay ng impormasyon sa mga pulis sa pinagtataguan ng most wanted person na si Augusto Lising Jr. na napatay naman sa shootout noong Hulyo 30.