COTABATO CITY, Maguindanao, Philippines – Napatay ang mag-inang lulan ng motorized boat makaraang pagbabarilin ng mga armadong kalalakihan sa naganap na pananambang sa Masungod River sa hangganan ng Bagua 1 at Bagua 2 sa Cotabato City, Maguindanao kahapon ng umaga.
Kinilala ang mag-ina na sina Saimona Abdulla Dimatingkal, 42; at Saada Dimatingkal, 4, mga residente ng Barangay Timako sa nasabing lungsod.
Sa salaysay ng mister ni Saimona na si Jainal Dimatingkal, sakay sila ng motorized boat pauwi mula sa pamimili ng mga pagkain at tubig nang pagbabarilin ng mga armadong lalaki pagsapit sa hangganan ng Bagua uno at Bagua dos kung saan pinasabugan pa ng granada.
Nakatalon pa si Jainal sa dagat ngunit hindi na nagawang isalba ang kanyang mag-ina dahil sa walang tigil na pagpapaputok ng mga pirata.
Nakilala naman ni Jainal ang mga suspek na pansamantalang hindi muna isiniwalat ang pagkakakilanlan habang pinaghahanap na ng pulisya.