Cotabato City, Philippines – Patay ang isang municipal administrator sa bayan ng South Upi, Maguindanao makaraang pagbabarilin ng hindi pa nakilalang nag-iisang armadong salarin sa Cotabato City kamakalawa ng hapon.
Kinilala ni Cotabato City Police Director P/Sr. Supt. Rolen Balquin, ang nasawing biktima na si Anastacio Rojas, 64-anyos, residente ng Purok Balikatan, Mother Barangay Rosary Heights sa nasabing lungsod.
Bandang alas-5 ng hapon ng maganap ang insidente sa harapan ng Philippine Airlines ticketing office na nasa tagiliran ng Filidian Bazar sa nabanggit na siyudad.
Sa imbestigasyon, sinabi ng opisyal na kabababa lamang ng biktima sa sasakyan nang barilin ng suspek na nagtamo ng sugat sa kanang kilikili na naglagos sa kaniyang dibdib.
Narekober naman sa crime scene ang isang slug ng cal. 45 na pistola na siyang ginamit sa pagbaril sa biktima.