CAVITE, Philippines – Pinabulagta ang 61-anyos na salon owner makaraang barilin ng isa sa dalawang gunmen sa loob ng pag-aaring shop sa Barangay Molino 4, Bacoor City, Cavite kamakalawa ng gabi. Napuruhan sa ulo ang biktimang si Redentor Ramos Jr., binata, owner ng Red Ram Beauty Salon at nakatira sa Soldier Hills Subd. sa nasabing barangay. Sa ulat ni P03 Michael Legaspi, pinasok ng dalawang di-kilalang lalaki ang nasabing salon saka pinutukan sa ulo ang biktima sa harap mismo ng kanyang mga tauhan. Nagimbal ang mga tauhan ng biktima na hindi nakapalag matapos masaksihan ang brutal na pagpatay sa kanilang amo. Narekober sa crime scene ang isang basyo ng cal. 45 pistol habang patuloy naman ang imbestigasyon.