MANILA, Philippines - Napagtripan ni kamatayan ang tatlong bata makaraang malunod habang naliligo sa ilog noong Linggo ng umaga sa Barangay Dayao, Roxas City, Capiz. Kinilala ang mga biktima na sina John Michael Antonio, 11; Gerry Libo-on, 10; at si Kent John Astrolabio, 6, na pawang naisugod sa Roxas Memorial Provincial Hospital subalit namatay din. Napag-alamang nagkatuwaang maligo sa ilog ang tatlo kung saan hindi naman nagpaalam sa kanilang mga magulang. Ayon sa imbestigasyon, unang lumundag sa tubig si Kent kung saan napagawi ito sa malalim na bahagi at nalunod. Namataan naman ito ng dalawang kalaro na sina Gerry at John Michael kung saan tumalon din para iligtas ang kaibigan. Gayon pa man, nanguyapit ang nalulunod na bata sa dalawa nitong kalaro kaya pare-parehong nilamon ng ilog. Nakita naman ng ilang residente ang mga bata kaya tinangkang sagipin at dalhin sa nasabing ospital subalit namatay din.