CAVITE, Philippines - Patay ang 38-anyos na misis makaraang salpukin ng rumaragasang van sa kahabaan ng Molino-Paliparan Road sa Barangay Salawag, Dasmariñas City, Cavite kamakalawa ng gabi. Naisugod sa Metro South Hospital subalit idineklarang patay ang biktimang si Marissa Estrebillo ng Block 28, Lot 39, Viva Homes Subd. sa nasabing barangay. Nasakote naman ang driver ng van na si Domingo Lukban, 63, ng Block 18, Lot 8, Ezekiel Street, Town and Country Subd., Barangay Burol 1, Dasmariñas City, Cavite. Sa police report, lumilitaw na tumatawid ang biktima sa nabanggit na lugar nang salpukin ng van (CTM 795) ni Lukban. Imbes na tumigil at saklolohan ang biktima ay pinaharurot pa ni Lukban ang sasakyan subalit nai-report sa mga awtoridad ng ilang nakasaksi kaya hinabol ng mga nagrorondang pulis.