NORTH COTABATO, Philippines - – Pinabulagta ang beteranong high school principal matapos itong barilin ng riding-in-tandem gunmen sa labas ng gate ng paaralan sa Barangay Kagawasan, Pagadian City sa Zamboanga del Sur kahapon ng umaga.
Sa police report na nakarating kay P/Chief Insp. Glenn Dulawan, hepe ng Pagadian City PNP na nakasakay sa kaniyang motorsiklo ang biktimang si Dindo Barsi nang lapitan at barilin sa ulo habang papasok sa gate ng Pagadian City National High School sa Purok Gumamela bandang alas-8 ng umaga.
Naisugod sa ospital ang biktima subalit idineklarang patay matapos mapuruhan sa ulo.
Sa ngayon ay inaalam pa ng pulisya ang motibo sa pagpaslang sa principal kung saan sinisilip ang anggulong may kaugnayan sa trabaho o sa pamilya.
Lumalabas din sa imbestigayson ng pulisya na hired killer ang bumaril sa biktima at maaaring may nagbayad lamang sa mga ito para gawin ang krimen.