MANILA, Philippines - Bumulagta ang mag-inang magkaangkas sa motorsiklo makaraang salpukin ng rumaragasang truck sa kahabaan ng highway sa Barangay Lumbangan, bayan ng Tuy, Batangas kahapon ng umaga. Sa ulat ni P/Senior Inspector Gaylor Pagala, hepe ng Tuy PNP, kinilala ang mag-ina na sina Marcela Rejas at Alyzza Rejas na kapwa idineklarang patay sa Apacible Memorial Hospital. Bandang alas-6:50 ng umaga nang mabangga ng truck (ZRL905) ni Maximino Makabili ang motorsiklo ng mag-ina. Sa lakas ng pagkakabangga ay tumilapon ang mag-ina mula sa motorsiklo na kapwa nagtamo ng malubhang sugat sa mga katawan. Nasakote naman ng mga operatiba ng pulisya ang driver ng truck na nahaharap sa kasong reckless imprudence resulting to double homicide at damage to property.