NORTH COTABATO , Philippines – Napatay ang lalaki na sinasabing notoryus na karnaper matapos makipagbarilan sa mga operatiba ng pulisya sa gitna ng palayan sa bahagi ng Purok 6, Barangay Osias, bayan ng Kabacan, North Cotabato kahapon ng umaga.
Sa police report na nakarating kay P/Supt. Jordine Maribojo, hepe ng Kabacan PNP, bigong makapagsagawa ng pangangarnap ang dalawang suspek kaya tinutukan ng baril ang kanilang biktima sa bahagi ng Barangay Dagupan.
Kaagad na inalerto ni P/Supt. Maribojo ang kanyang mga tauhan matapos makatanggap ng impormasyon kaugnay sa modus operandi ng dalawang di-kilalang lalaki.
Inilatag ng pulisya ang ilang checkpoint na posibleng pagdaanan ng dalawang karnaper hanggang sa maispatan ang mga suspek sa bahagi ng Purok 6 sa nasabing barangay.
Gayon pa man, imbes na sumuko ay namaril pa ang mga ito kaya gumanti rin ng putok ang mga pulis hanggang sa mapatay ang dalawa.
Narekober mula sa pinangyarihan ng insidente ang basyo ng cal.45 pistol, 1 bag na naglalaman ng 2-piraso ng hair wig at ang gamit na motorsiklo ng mga suspek.