MANILA, Philippines - Sinalubong ni kamatayan ang 15-anyos na estudyante na sinasabing sobra ang kakulitan matapos na aksidenteng makuryente habang kinakalikot ang poste ng kuryente sa paanan ng tulay sa bayan ng Las Nieves, Agusan del Norte kamakalawa ng hapon. Kinilala ang biktima na si John Lowie Rosales, Grade VI pupil sa Mat-I Elementary School at nakatira sa Purok 3, Barangay Pinanaan. Sa ulat ng pulisya, pauwi na ang biktima mula sa eskuwelahan nang kalikutin nito ang linya ng kuryente na nakakabit sa poste sa ibabang bahagi ng tulay sa Purok 4 sa nabanggit na barangay. Bunga nito ay nahawakan ng biktima ang nabalatang linya ng kuryente kaya nagkikisay ito dahil sa malakas na boltahe ng kuryente. Kaagad namang iniulat ng mga batang estudyante na nakasabay ng biktima sa kaniyang mga magulang ang naganap na insidente.