CAMP VICENTE LIM, Laguna, Philippines – Dalawang kawani ng steel company ang pinagbabaril hanggang sa mapatay ng mga hijacker saka inabandona sa kahabaan ng Southern Luzon Expressway sa San Pedro City, Laguna kamakalawa ng umaga.
Kinilala ang dalawa na sina Rey Albiar, 33, ng Trece Martirez, Cavite; at Roberto Yapot, 39, ng Barangay Mabini sa bayan ng Baras, Rizal, mga kawani ng Newtech Equipment Specialist Company sa San Agustin Village, Moonwalk, Parañaque City.
Sa police report, natagpuan ang bangkay ng dalawa sa madilim na bahagi ng perimeter fence ng southbound lane ng SLEX sa Barangay San Antonio bandang ala-1:45 ng madaÂling araw.
Bago maganap ang insidente, lumilitaw na magkasama sa trailer truck (TOV-429) ang mga biktima para mag-deliver ng mga high-beams at steel forms na nagkakahalaga ng P1.2 milyon.
Natagpuan ang abandonadong trailer bed ng truck malapit sa Estate Land Subdivision sa bayan ng General Trias, Cavite habang nawawala naman ang tractor head ng sasakyan.
May teorya ang pulisya na itinapon ang mga biktima sa nasabing lugar matapos haydyakin ang kanilang truck sa di-pa matukoy na lugar.