MANILA, Philippines - Magkasunod na pagsabog ng bomba ang yumanig sa bayan ng Pikit sa North Cotabato nitong Lunes ng madaling araw.
Ayon kay Senior Inspector Jojie Nicolas, hepe ng Pikit municipal police, walang nasugatan sa magkasunod na mga pagsabog ngunit mag-iwan ang mga ito ng matinding takot sa mga residente.
Sumabog ang unang bomba malapit sa isang ginagawa pa lamang na gym na may ilang metro ang layo sa Cotabato-Davao Highway.
Habang humahangos ang mga pulis at sundalo, isa pang bomba ang sumabog may ilang metro lamang ang layo sa ginagawang gym.
Isa pang improvised explosive device ang natagpuan ng mga awtoridad 'di kalayuan sa pinagtaniman ng dalawang bombang sumabog.
Halis limang oras ding isinara ng mga awtoridad ang highway habang tinitiyak na wala nang iba pang bomba na nakatanim sa lugar.
Ayon kay Captain Tony Bulao, tagapagsalita ng 602rd Brigade ng Philippine Army, kumikilos na ang kanilang mga tauhan upang tulungan ang pulisya sa imbestigasyon ng magkasunod na pagsabog.
Inaalam pa ng pulisya kung aling grupo ang sangkot sa pambobomba.