CAVITE , Philippines – Nabahiran ng lungkot ang masayang summer outing ng mga kawani ng pizza parlor matapos mamatay ang isa habang aabot naman sa 20 ang nasugatan sa naganap na sakuna sa bayan ng Maragondon, CaÂvite, kahapon ng umaga. Kinilala ng pulisya ang namatay na si Beverlyn Agato,19, kahera ng Yellow Cab Pizza at nakatira sa Makati City habang naisugod naman sa San Lorenzo Ruiz Hospital ang mga sugatang biktima. Nasakote naman ang driver ng jeepney na si Crispin Herrera, 34, ng #5324 Binakod Street, Barangay Olympia, Makati City. Ayon kay PO2 Teddy Labampa, nawalan ng preno ang jeepney (PKG-203) pagsapit sa nasabing lugar kaya nagpagiwang-giwang ang sasakyan hanggang sa tumilapon palabas ang biktima. Nabatid na ang mga biktima ay patungong beach resort para sa kanilang company outing nang makasalubong ang trahedya.