BULACAN , Philippines – Napatay ang 46-anyos na hepe ng barangay tanod matapos itong pagbabarilin ng kanyang nakaalitan sa harap ng barangay hall sa Barangay Tugatog, Meycauayan City, Bulacan kamakalawa ng hapon. Naisugod sa Meycauayan City Medical Hospital ang biktimang si Edmund Abilo Sr. subalit namatay din habang pinaghahanap naman ang suspek na si Octavio Pilongo ng Meycauayan City Task Force. Sa imbestigasyon ni PO3 Allan Lampano, senglot ang suspek na nagtungo sa barangay hall kung saan hinahanap nito ang biktima. Nagkataon namang lumabas sa barangay hall ang biktima kung saan ito niratrat ng suspek. Napag-alamang nakaalitan ng biktima ang isa sa kaanak ng suspek may tatlong araw na ang nakalipas bago maganap ang pamamaslang.