QUEZON , Philippines - Sa pagnanais na hindi na maging pabigat sa kanyang pamilya sa pag-aalaga sa sakit na diabetes, winakasan ng 61-anyos na mister ang sariling buhay makaraang magbaril ito sa ulo kamakalawa ng umaga sa Barangay Sto. Cristo, bayan ng Sariaya, Quezon. Sa police report na nakarating kay P/Supt. Joel de Mesa, chief of police rito, isinagawa ng biktimang si Herminigildo Sulit ang pagpapakamatay gamit ang cal. 38 revolver bandang alas-5 ng umaga sa loob ng palikuran ng kanilang bahay. Lumalabas sa imbestigasyon na bago maganap ang insidente, naisugod sa Candelaria Hospital ang biktima dahil sa sakit na acute diabetes. Naikuwento pa ng biktima sa kanyang mga kaanak na mas gugustuhin na lamang niyang magpakamatay sa halip na maghirap ang mga ito sa pag-aalaga sa kanya. Inakala ng mga kaanak na nagbibiro lamang ang biktima hanggang sa maganap ang insidente.