LUCENA CITY , Quezon , Philippines - Napatay ang 45-anyos na Inhinyero matapos na pagbabarilin ng di-kilalang lalaki kamakalawa ng gabi sa bahagi ng Puerto del Mar Subd., Barangay Ilayang Iyam sa Lucena City, Quezon. Kinilala ng pulisya ang napatay na si Engr. Leo Ingles habang sugatan naman ang anak nitong si Jasper Ingles na naisugod sa Lucena Doctors Hospital matapos tamaan ng ligaw na bala. Sa ulat ni P/Senior Insp. Marcelino Uy, papasok na ang biktima sa garahe ng kanilang bahay gamit ang Honda Civic (UHY-969) nang lapitan at holdapin ng di-kilalang lalaki. Tumanggi namang magbigay ng biktima kaya siya niratrat kung saan tinamaan naman ng ligaw na bala ng cal. 45 pistol ang kanyang anak na tinangkang tumakbo sa ikalawang palapag ng kanilang bahay kasama ang kanyang tiyahin.