MANILA, Philippines - Brutal ang ginawang pagpatay sa mag-ina matapos itong pagpapaluin ng mga miyembro ng Akyat-Bahay Gang ay sinunog pa ang bangkay ng matanda sa Barangay Pulungmasle, bayan ng Guagua, Pampanga kamakalawa ng gabi.
Sa police report na nakarating kay P/Chief Supt. Raul Petrasanta, hepe ng PNP regional office 3, kinilala ang mga napatay na sina Adelaide Santos, 67, retiradong guro na sinunog pa ang bangkay sa likuran ng kanilang bahay.
Ipinag-utos na rin ni PetraÂsanta ang pagbuo ng special task group upang imbestigahan ang karumal-dumal na krimen.
Samantala, inaalam pa ng mga imbestigador kung hinalay muna bago pinaslang ang 29-anyos na anak na si Ivy na nakitang duguan sa loob ng palikuran.
Bandang alas-7 ng gabi nang ipagbigay-alam ni Barangay Chairman Felicisimo Santos ang krimen sa pulisya na nadiskubre ng mga kapitbahay ng mag-ina nang mamataan ang sinunog na bangkay ng retiradong guro.
Ayon pa sa opisyal, blangko pa rin ang mga imbestigador sa pagkakakilanlan sa mga suspek na pinaniniwalaang kakilala ng mga biktima kaya isinagawa ang pagpaslang.
Kabilang sa mga anggulong sinisilip ay ang pagnanakaw.