BULACAN, Philippines - — Apat na kalalakihan kabilang ang isang tulak ng shabu ang naaresto matapos na maaktuhan ang mga ito na nagsasagawa ng pot session sa loob ng bahay sa Brgy. Perez, Meycauayan City, Bulacan kahapon.
Hindi na nakapalag pa ng dakmain ang mga suspek na sina Ramil “Tiki†Flores, 32; Florentino Quiros, 24; Renel de Jesus, 19, pawang mga residente ng Brgy. Perez at Miguelito Galleges, 27, residente ng Brgy. Malhacan sa siyudad ding ito.
Ayon sa ulat ni P/Supt. Rafmil Corfuz dakong alas-4:00 ng hapon ay isang residente ang nag-ulat sa pulisya hinggil sa nagaganap na pot session ng apat na kalalakihan sa loob ng Berbosa Apartment na nasa Rosas St., Brgy. Perez at nang makumpirma ay agad na isinagawa ang operasyon na nagresulta sa pagkakaaresto ng mga suspek.
Narekober sa lugar ang tatlong sachet ng shabu na nagkakahalaga ng P1,500 piso,mga drug paraphernalias, habang nabatid din na dati ng nadakip si Flores na may kaparehong kaso sa shabu.