TUGUEGARAO CITY, Cagayan, Philippines - – Kalaboso ang binagsakan ng 18-anyos na lalaki matapos arestuhin ng pulisya sa tangkang pagpupuslit ng 82-bricks ng pinatuyong dahon ng marijuana na nagkakahalaga ng P1.5 milyon sa isinagawang operasyon sa Barangay Naganacan, bayan ng Sta. Maria, Isabela kamakalawa. Pormal na kinasuhan ni P/Senior Supt. Sotero Ramos Jr. ang suspek na si Raymund Sinumplag ng Barangay Lacnog, Tabuk City, Kalinga. Samantala, dalawa sa kasabwat ni Sinumplag ang nakatakas matapos matunugan ang inilatag na drug bust operation ng pulisya. Nabatid na isinilid ang kontrabando sa tatlong kahon na tangkang dalhin sa Maynila subalit natunugan ng mga operatiba ng pulisya sa bus station.