TUGUEGARAO CITY, Cagayan , Philippines - Bulagta at hindi na nakaabot ng bagong taon ang 28-anyos na mekaniko matapos nitong tumbukin ang sinusundang trailer tractor dahil sa wala itong ilaw at reflector na naglalakbay sa kahabaan ng highway sa Barangay Victoria, Alicia, Isabela kamakalawa ng gabi. Kinilala ni P/Chief Insp. Edilmar Alviar, hepe ng Alicia PNP ang biktima na si Eric Gradonozo ng Barangay Mataas-na-Kahoy. Lumalabas sa imbestigasyon, tinatahak ng biktima ang highway nang hindi napansin ang sinusundang trak ni Vicente Berlan, 39, ng Brgy. Salinungan West, bayan ng San Mateo. Sa lakas ng pagkakabanga ay tumilapon ng ilang metro ang biktima kung saan hindi na umabot ng buhay sa pribadong pagamutan sa Santiago City. Inaresto naman ng pulisya ang operator ng tractor na kuliglig na bukod sa kasong homicide through reckless imprudence ay lumabag ito sa ordinansang naglalayong lagyan ng ilaw o reflector ang mga trailer tractor.