NUEVA VIZCAYA , Philippines – Lima-katao ang kumpirmadong namatay habang tatlong iba pa ang nasa kritikal na kalagayan matapos magkarambola ang apat na sasakyan sa kahabaan ng highway sa Barangay Baretbat, bayan ng Bagabag, Nueva Vizcaya kamakalawa ng gabi.
Kinilala ang mga naÂmatay na sina James Ablang, 13; Jerome Jay Padua, 23; Baby Claire Baroña, 3-month old; Tessie Baroña, at si Rosalinda Balut, 9, pawang nakatira sa Barangay Villaros sa nasabing bayan.
Kritikal naman ngayon sa pagamutan sina Maricel Baroña, 25; Princess Calob, 18; at si April Joy Padua, 18.
Ayon kay P/Chief Insp. Maciste Extor Serrano, hepe ng Bagabag PNP, naganap ang sakuna dakong alas-7:30 ng gabi kamakaÂlawa sa Sitio Kinacao.
Napag-alamang magkakasunod na tinatahak ng tatlong trak ang pababang bahagi ng highway nang mawalan ng preno ang Isuzu trak (RJB 279) ni Jhun Jhun Cacayan.
Inararo umano nito ang kasalubong na traysikel na sinasakyan ng mga biktima kaya tumilapon ang mga ito sa kalsada.
Nadamay din ang Isuzu truck (UCX966) ni Jayson Calixtro at isa pang Isuzu truck (RKD 313) ni Rocky Baggay.
Agad namatay sina Ablang, Padua matapos nagulungan ng trak at ang sanggol na si Baby Claire habang sina Baroña at Balut naman ay namatay sa VeÂterans Regional Hospital sa bayan ng Bayombong.