MANILA, Philippines - Napatay ang 48-anyos na election officer matapos itong pagbabarilin ng motorcycle-riding gunmen sa madamong bahagi ng highway sa bayan ng Matalam, North Cotabato kamakalawa. Sa ulat ni P/Senior Supt. Rodelio Jocson na isinumite sa Camp Crame, kinilala ang biktima na si Ted Monteverde Sispon, 48, opisyal ng Comelec sa bayan ng Parang, Maguindanao. Base sa pagsisiyasat ng pulisya, lulan ng multicab si Sispon patungong Matalam mula sa Kidapawan City nang puntiryahin ng tandem. Gayon pa man, nagmintis ng paputukan si Sispon na nakaupo sa dulong bahagi ng sasakyan kaya hinarang ang multicab at tinutukan ang driver. Agad namang tumalon si Sispon kung saan nagtatakbo pero hinabol ito ng gunmen at niratrat sa madamong bahagi ng highway.