NORTH COTABATO, Philippines - – Dalawa-katao ang iniulat na namatay matapos na sumiklab ang bakbakan ng dalawang pamilya sa Barangay Busaon, bayan ng Banisilan, North Cotabato kamakalawa. Sa ulat ni 602nd Brigade spokesperson Capt. Tony Bulao, ang dalawang napatay na lalaki na sinasabing pinagbabaril ng mga tauhan ni dating Barangay Kagawad Bobby Rajamuda ay mga tauhan ni Kumander Tanda. Nabatid na matagal ng may alitan ang dalawang grupo matapos iturong suspek ng mga tauhan ni Rajamuda ang mga tauhan ni Kumander Tanda na nasa likod ng pananambang sa dating barangay kagawad. Si Rajamuda at iba pang kasama nito ay nakaligtas matapos tambangan sa Barangay Thailand, Banisilan bago ang midterm elections noong Mayo. Ayon kay Captain Bulao, balak pa sanang maghiganti ng grupo ni Kumander Tanda pero napigilan ito ng militar.