TUGUEGARAO CITY, Philippines- Pinabulagta ang isang magsasaka habang isa ring lola ang malubhang sugatan matapos barilin ng de-sabog ng kanilang kaalitan sa lupa sa dalawang magkakahiwalay na insidente sa Brgy. Malintao, Echague at Brgy. Masipi East, Cabagan, Isabela kamakalawa.
Kinilala ni Isabela Police Spokesman Supt. Narciso Paragas ang nasawi na si Rey Luceda, 50 anyos ng Brgy. Malintao samantalang ang suspek naman ay si Santiago Batag, 49 ng Brgy. Garit Sur ng nasabi ring bayan.
Ayon kay Paragas, sumuko ang suspek sa mga opisÂyales ng Barangay matapos niyang mapuruhan ng desabog ang biktima.
Sa bayan ng Cabagan, nasa malubha namang kalagayan ang isang 64 anyos na Lola na si Honoria Reyes ng Brgy. Masipi East matapos itong barilin ng de-sabog ng kaalitan nito sa lupa na si Jaymar Reyes 24 na taga Brgy. Pilig Alto sa nasabing bayan. Ang biktima ay isinugod sa Faustino Dy Sr. Memorial Hospital sa kabisera ng Iligan City. Patuloy ang pagtugis ng pulisya sa suspek.