MANILA, Philippines - Napatay ang misis ng barangay chairman habang tatlong naman ang nasugatan matapos masabugan ng granada na inihagis ng mga di-kilalang lalaki sa bahay ng barangay opisyal sa Lamitan City, Basilan noong Miyerkules ng umaga. Kinilala ni P/Senior Supt. Mario Dapilloza, Basilan PNP director ang namatay na si Sapiya Mansul, misis ni Barangay Chairman Gais Mansul sa bayan ng Mohamad Ajul, Basilan. Samantala, sugatang naisugod sa ospital sina Sonia de los Santos, Reynaldo de los Santos at si Chairman Mansul. Sa police report na nakarating sa Camp Crame, natutulog ang mag-asawang Mansul sa kanilang bahay sa Barangay Matibay nang hagisan ng granada ng mga di-kilalang lalaki na lulan ng motorsiklo. Nasapul sa pagsabog ng granada ang biktima na natutulog malapit sa pintuan ng kanilang bahay.