MANILA, Philippines - Humantong sa trahedya ang masayang outing ng isang pamilya sa beach resort makaraang sumalpok ang van sa telecommunications tower na ikinasawi ng anim na magkakapamilya sa bayan ng Monkayo, Compostela Valley kamakalawa ng gabi.
Kabilang sa mga nasawing biktima ay sina Fe Monares, 40; Nikki,16; Khea, 14; mga anak ni Fe; mga pinsang sina Ronald, 39; Rhona Mae Anghad at si Kenneth Mascariñas.
Sugatan naman ang apat kabilang na ang driver na si Nilo Mascariñas na pawang naisugod sa ospital.
Sa ulat ni P/Senior Supt. Camilo Cascolan, director ng Compostella Valley PNP, naganap ang malagim na sakuna sa kahabaan ng Davao-Agusan Highway sa bahagi ng Purok Dao, Barangay Banlag, Monkayo bandang alas-9:45 ng gabi.
Base sa police report, ang mga biktima ay lulan ng van mula sa Island Garden City of Samal sa Davao del Norte at pauwi na sana nang makasalubong si kamatayan pagsapit sa pakurbadang kalsada kung saan nagpagewang-gewang ang takbo nito hanggang sa sumalpok sa telecom tower.
Sa lakas ng pagkakasalpok ay bumaliktad at halos nayupi ang van kung saan naipit sa loob ang mga nasawi.