CAMP SIMEON OLA, Legazpi City , Philippines – Napatay sa sayawan ang 46-anyos na mister habang ang kanyang misis naman ay malubhang nasugatan matapos tamaan ng ligaw na bala ng baril mula sa dalawang grupo ng kalalakihan na nagbarilan kahapon ng madaling-araw sa Barangay Maihao, bayan ng Cawayan, Masbate. Idineklarang patay sa Cawayan District Hospital ang biktimang si Gerry Betache, magsasaka at sugatan naman si Judita Betache, 47. Tugis naman ng pulisya ang mga suspek na sina Geor Delos Santos, Johnrey Ursal, at si Robert Ursal na pawang nakatira sa Barangay Begia. Nabatid na nagsasayaw ang mag-asawa sa plaza dahil sa kapistahan nang sumiklab ang barilan ng magkalabang grupo na sinasabing kapwa supporter ng magkalabang kandidato noong nakalipas na eleksyon.