BULACAN , Philippines – Rehas na bakal ang binagsakan ng limang kalalakihan na sinasabing tulak ng droga matapos itong masakote ng pulisya sa inilatag na buy-bust operation sa magkahiwalay na bayan sa lalawigan ng Bulacan kamakalawa.
Kinilala ng pulisya ang mga suspek na sina Amrex Saripada, Saidami Saripada, kapwa nakatira sa Area D, Brgy. Sta. Cruz I, San Jose Del Monte City, Bulacan; Angelito David ng Brgy. San Manuel II, Dasmariñas City, Cavite; Lynbert Jacinto ng Brgy. Bayugo; at si Eduardo Alban ng Brgy. Malhacan, Meycauayan City, Bulacan.
Sina Amrex at Saidami Saripada ay dinakma sa Barangay Tigbre sa bayan ng Norzagaray kung saan nasamsam ang ilang sachet ng shabu at dalawang motorsiklo.
Samantala, naaresto naman si David sa Brgy. Bancal, Meycauayan City habang sina Jacinto at Alban naman ay nasakote sa Brgy. Bayugo kung saan nasamsam ang isang supot na pinatuyong dahon ng marijuana.