BULACAN, Philippines – Napatay ang 44-anyos na pangulo ng homeowner’s association matapos itong pagbabarilin ng maskaradong lalaki sa gilid ng kanilang bahay sa Brgy. Bayugo, Meycauayan City, Bulacan kamakalawa ng gabi. Labing-apat na bala ng cal. 45 pistol ang tumapos sa buhay ni ex-P01 Manuel Mendoza ng Northville 3 sa nasabing barangay. Ayon kay P02 Phillip Santos, nagpupuno ng tubig sa drum ang biktima nang lapitan at ratratin kung saan nagpulasan naman ang ilang kapitbahay matapos umalingawngaw ang sunud-sunod na putok ng baril. Mabilis na tumakas ang gunman lulan ng motorsiklo at bagama’t sugatan ang biktima ay nagawa pa nitong magpahatid sa ospital subalit idineklara na itong patay.