MANILA, Philippines - Dalawang negosyanteng Koreano ang malubhang nasugatan makaraang pagbabarilin ng riding-in-tandem assassins sa bahagi ng Barangay Pajac, Lapu-Lapu City, Cebu kamakalawa. Kinilala ng pulisya ang mga biktima na sina Lee Dong Gun, 46; at Jung Ha Bok, 40; kapwa nakatira sa Pacific Villa sa nasabing lungsod. Nabatid na isa sa dalawang trader ay nagmamay-ari ng souvenir shop habang ang isa naman ay underwater tour business sa Lapu-Lapu City. Sa ulat ng pulisya na nakarating sa Camp Crame, naganap ang insidente sa harapan ng Pacific Villa dakong alas-8 ng umaga. Nakasakay ang dalawa sa puting Dodger Durango (OSK 888) nang lapitan at ratratin ng dalawang lalaking magkaangkas sa motorsiklo.