MANILA, Philippines - Dalawang opisyal ng Department of Education (DepEd) ang iniulat na nalunod matapos lumubog ang kanilang bangka sa karagatan ng Puyo, Calatrava Island, Romblon kahapon ng tanghali. Kinilala ni National Disaster Risk Reduction and Management Council Executive Director Benito Ramos ang mga nasawing biktima na sina Eve Fajutag, 66; at Grace Mallorca, 55.
Patuloy namang pinaghahanap ang isa pang guro na si Ana Adarlo na tuluyang nilamon ng malakas na alon.
Nasagip naman ang 52 pasahero habang ligtas din ang 9 tripulante ng nasabing bangka.
Ayon sa ulat, naglalayag ang bangkang El Kapitan na may lulang 55 guro mula sa Simara Island patungong Romblon nang balyahin ng malaking alon bago unti-unting lumubog.
Mabilis namang rumesponde ang search and rescue team ng Phil. Coast Guard.