Butler ibinigay sa Warriors
PHILADELPHIA -- Bumira si Tyler Herro ng 30 points at humakot si Bam Adebayo ng 18 points at 13 rebounds para tulungan ang Miami sa 108-101 pagsunog sa 76ers sa gabi kung saan dinala ng Heat si Jimmy Butler sa Golden State Warriors.
Nag-ambag si Nikola Jovic ng 23 points kasunod ang 20 markers ni Terry Rozier.
Nauna nang sinuspinde ng Miami (25-24) si Butler.
Nakuha ng Golden State si Butler mula sa Miami kapalit nina forwards Andrew Wiggins at Kyle Anderson dagdag ang isang top-10 protected 2025 first-round pick.
Sangkot din sa trade ang Utah Jazz na nakuha si guard Dennis Schroder mula sa Golden State, habang tatanggapin ng Detroit Pistons si Lindy Waters III buhat sa Warriors at si Heat guard Josh Richardson.
Umiskor naman si Tyrese Maxey ng 31 points para sa Philadelphia (20-30) at nagdagdag si Kelly Oubre Jr. ng 15 points at 11 rebounds.
Sa Salt Lake City, tumipa si Fil-Am Jordan Clarkson ng 31 points at may 26 markers si Keyonte George sa 131-128 paglusot ng Jazz (12-37) sa Warriors (25-25).
Sa Denver, dinuplika ni Michael Porter Jr. ang kanyang career high na 39 points at may 38 markers si Nikola Jokic sa 144-119 pagmasaker ng Nuggets (32-19) sa New Orleans Pelicans (12-39).
Sa Atlanta, isinalpak ni Victor Wembanyama ang isang free throw sa huling 2.4 segundo habang may 24 markers si De’Aaron Fox sa 126-125 pagtakas ng San Antonio Spurs (22-26) sa Hawks (23-28).