MANILA, Philippines — Pakakawalan ng Congress of Philippine Aquatics (COPA) ang National Capital Region (NCR) One For All-All For One Swim Series Leg 3 sa Linggo sa Rizal Memorial Swimming Center sa Malate, Manila.
Sa pagtataguyod ng Speedo Philippines, Philippine Sports Commission (PSC) at basbas ng Philippine Aquatics, Inc. (PAI), itatampok ang pinakamatitikas na junior swimmers at inspiradong novice athletes sa torneo na bahagi ng malawakang programa sa grassroots level ng COPA na pinamumunuan ng swimming icon at Batangas 1st District Congressman Eric Buhain.
Sinabi ni tournament director Chito Rivera, pangulo rin ng Samahang Manlalangoy sa Pilipinas (SMP), na bukas ang kompetisyon sa lahat ng batang swimmers maging anuman ang swimming club o organisasyon na kinaaaniban.
“Since Day 1 nang kilalanin ng Philippine Olympic Committee at ng World Aquatics ang PAI bilang lehitimong swimming association sa bansa, inclusivity at hindi na exclusivity ang isinusulong na programa ng PAI at kaanib kami sa pagsusulong ng pagbabago sa swimming community,” ani Rivera.
Ang torneo ay bahagi rin sa paghahanda ng mga swimmers para sa isasagawang national tryouts ng PAI para sa bubuuing koponan na isasabak sa Southeast Asian Age Group Championship sa Disyembre sa Bangkok, Thailand.
Libreng makalalahok sa torneo ang mga estudyante mula sa mga pampublikong eskwelahan at walang regular na swimming club.
“Magdala lang sila ng mga katibayan na enrolled sila sa eskwelahan, libre ang kanilang participation fee,” ani Rivera na siya ring Executive Director ng PAI.