Kinuha ang 3-0 lead sa Lakers sa West showdown
LOS ANGELES -- Kumana si Jamal Murray ng 37 points at nagtala si Nikola Jokic ng 24 points at 8 assists sa 119-108 paggupo ng Denver Nuggets sa Lakers at.. ilista ang 3-0 lead sa kanilang Western Conference finals series.
Humugot si Kentavious Caldwell-Pope ng 12 sa kanyang 17 points sa second half para sa Denver na maaari ang walisin ang Los Angeles sa Game Four bukas patungo sa una nilang NBA Finals matapos ang 47 taon.
“We have that dog mentality where no matter if we’re up, down, we’re going to continue to fight and play our game, and do it at a high level. We’re going to continue to do that for the rest of these games,” ani Caldwell-Pope na dating player ng Los Angeles.
Nagdagdag si Bruce Brown ng 15 markers, habang nagsumite si Michael Porter Jr. ng 14 points, 10 rebounds at 6 assists para sa Nuggets.
Wala pang koponan sa NBA history na nakabangon mula sa 0-3 pagkakalubog at ipanalo ang isang serye.
Pinamunuan ni Anthony Davis ang Lakers sa kanyang 28 points at 18 rebounds, habang humakot si LeBron James ng 23 points, 12 assists at 7 rebounds.
May 23 markers din si Austin Reaves.
Sa kabila ng pagkakahulog sa 0-3 ay kumpiyansa pa rin si James na makakabalik sila sa serye simula sa Game Four.
“Just focus on game four, and you know, that’s all you can really think about,” ani James. “Obviously this game is over and done with. We had some opportunities, but we didn’t come through.”
“So just get ready for Monday and just got to get one. It’s a one-game series for us. Every game counts,” dagdag ng four-time NBA champion player.
Inagaw ng Los Angeles ang 94-93 abante mula sa dalawang free throws ni Rui Hachimura sa 7:48 minuto ng fourth quarter mula sa 14-point deficit.
Ngunit isang 13-0 bomba ang inihulog ng Denver tampok ang tatlong triples nina Jeff Green, Brown at Murray patungo sa pagpoposte ng 12-point lead sa 4:51 minuto ng laro.
Ang tres ni Porter ang tuluyan nang naglayo sa Nuggets sa 117-103 sa nalalabing 1:06 minuto na nagpatahimik sa mga fans ng Lakers.