MANILA, Philippines — Isusulong ni Asian Youth 18-under chess titlist John Marvin Miciano ang kanyang kampanya para maging Filipino Grand Master sa ilalim ng Go For Gold program.
Para makamit ito ay kailangan ng pinakabatang International Master mula sa Davao City na makakuha ng tatlong GM norms sa paglalaro sa mga overseas tournaments laban sa mga highly rated chessers.
Sasali si Miciano sa FIDE Asian Zone 3.3 championships na nakatakda sa Abril 6-16 sa Ulaanbaatar, Mongolia.
Sasabak sa torneo ang mga pinakamahuhusay na woodpushers sa rehiyon kasama ang mga top-rated players mula sa Vietnam at Indonesia.
“Chess is one sport where Filipinos can excel. It is a test of mental strength,’’ wika ni Go For Gold godfather Jeremy Go. “I think Marvin is one of our brightest young athletes who deserve our support.’’
Malaki ang paniniwala ni Go, sinusuportahan ang walong sports, na makakamit ni Miciano, iginiya ang Far Eastern University sa UAAP title, ang kanyang pangarap.
Bukod kay Miciano, itinataguyod din ng Go For Gold sina skateboarder superstar Margielyn Didal, ang Philippine dragonboat team ng Philippine Canoe-Kayak Dragonboat Federation at sina cycling hero Rex Luis Krog at reigning Southeast Asian Games men’s triathlon champion Nikko Huelgas.