MANILA, Philippines — Hindi maawat si James Aranas para makahirit ng tiket sa semifinals ng prestihiyosong 2019 World Pool Series Predator Grand Final na ginaganap sa Steinway Café-Billiards sa Astoria, New York.
Muling pinataob ni Aranas si veteran cue master Petri Makkonen ng Finland sa bisa ng 13-10 panalo sa fourth round habang sinorpresa naman nito si 2017 World Pool Series Aramith Masters champion Klenti Kaci ng Albania sa quarterfinals, 13-11.
Nauna nang tinalo ni Aranas si dating world champion Darren Appleton ng Great Britain sa pamamagitan ng 11-4 demolisyon sa third round.
Ilalabas ni Aranas ang lahat ng alas nito sa semis dahil makakatipan nito si legendary Ralf Souquet ng Germany na marami nang world titles sa kanyang ilang dekadang paglalaro.
Umusad sa semis si Souquet nang manaig kay Mike Dechaine ng Amerika sa quarterfinals, 13-9.
Maghaharap naman sa hiwalay na semis match sina Joshua Filler ng Germany at Chris Melling ng Great Britain.